நியூசிலாந்துக்கு எதிரான டி20 தொடரை வங்கதேச அணி கைப்பற்றியது!

வங்கதேசத்துக்குச் சுற்றுப்பயணம் செய்து 5 டி20 ஆட்டங்களில் விளையாடுகிறது நியூசிலாந்து அணி. முதல் 3 ஆட்டங்களின் முடிவில் வங்கதேச அணி 2-1 என முன்னிலை வகித்தது. 4-வது டி20 ஆட்டம் டாக்காவில் நடைபெற்றது. டாஸ் வென்ற நியூசிலாந்து அணி பேட்டிங்கைத் தேர்வு செய்தது.

பேட்டிங்குக்குக் கடினமான ஆடுகளத்தில் நியூசிலாந்து அணி 19.3 ஓவர்களில் 93 ரன்களுக்கு அனைத்து விக்கெட்டுகளையும் இழந்தது. வில் யங் அதிகபட்சமாக 46 ரன்கள் எடுத்தார். நசும் அகமது, முஸ்தாபிசுர் ரஹ்மான் தலா 4 விக்கெட்டுகளை வீழ்த்தினார்கள்.

மிகவும் விறுவிறுப்பாக நடைபெற்ற இந்த ஆட்டத்தில் வங்கதேச அணி, 19.1 ஓவர்களில் 4 விக்கெட் இழப்புக்கு 96 ரன்கள் எடுத்து 4-வது டி20 ஆட்டத்தில் வெற்றி பெற்று டி20 தொடரையும் கைப்பற்றியுள்ளது. கேப்டன் மஹ்முதுல்லா 43 ரன்கள் எடுத்துக் கடைசிவரை ஆட்டமிழக்காமல் இருந்தார்.

வங்கதேச அணி டி20 தொடரில் 3-1 என முன்னிலை வகிக்கிறது. 5-வது டி20 ஆட்டம் செப்டம்பர் 10 அன்று நடைபெறுகிறது.