சக்தி வாய்ந்த குடும்ப ஆட்சியில் 30 மாதங்களில் இலங்கையை வங்குரோத்தாக்கியது!

ஜனாதிபதி கோட்டாபய ராஜபக்ச ஆட்சிக்கு வந்த பின்னர் இலங்கை எவ்வாறு வங்குரோத்து நிலைக்குச் சென்றுள்ளது என்பது குறித்து Bloomberg சஞ்சிகை விரிவாக விளக்கியுள்ளது.

2019 நவம்பர் ஜனாதிபதித் தேர்தலுக்கு முன்னர் வரிக் குறைப்புகளை அப்போதைய ஜனாதிபதி வேட்பாளர் கோட்டாபய ராஜபக்ச அறிவித்த போது, ​​இலங்கையின் அப்போதைய நிதியமைச்சர் மங்கள சமரவீம, இது ஒரு ஆபத்தான நடவடிக்கை என்று தெரிவித்திருந்தார்.

இந்த முன்மொழிவுகள் நடைமுறைப்படுத்தப்பட்டால் முழு நாடும் திவாலாகிவிடும் என்றும் கூறினார். முழு நாடும் மற்றொரு வெனிசுலா அல்லது மற்றொரு கிரேக்கமாக மாறும்” என்று அமைச்சர் எச்சரித்திருந்தார்.

போர், நோய் மற்றும் அதிக பணவீக்கம் நிறைந்த உலகத்தில் பயணிக்கும் ஜனரஞ்சகத் தலைவர்களுக்கு ஒரு எச்சரிக்கைக் கதையாக மாறிய அவரது கணிப்பு நிறைவேறுவதற்கு வெறும் 30 மாதங்களே ஆனது என்று Bloomberg தெரிவித்துள்ளது.

2019 ஜனாதிபதித் தேர்தல் வெற்றியைத் தொடர்ந்து, ஜனாதிபதி கோட்டாபய ராஜபக்ச  உடனடியாக நடைமுறைக்கு வரும் வகையில் வரி குறைப்புகளை அறிவித்துள்ளார்.

சில மாதங்களுக்கு முன்னர் இலங்கை தனது அத்தியாவசிய உணவுப் பொருட்களை இறக்குமதி செய்யக் கூட பணமில்லாத நாடாக மாறி, சுதந்திரம் பெற்ற பின்னர் முதல் தடவையாக கடனை அடைக்க முடியாத நிலை ஏற்பட்டது.

2019 தேர்தலில் கோட்டாபய ராஜபக்ச வெற்றி பெற்ற பிறகு, ஆசியாவின் மிகவும் சக்திவாய்ந்த வம்சங்களில் ஒன்றை மீண்டும் உருவாக்கினார், அவர் தனது முதல் அமைச்சரவை கூட்டத்தில் உடனடியாக வரி குறைப்பை நிறைவேற்றினார்.

பின்னர் அவர் தனது சகோதரரான மகிந்த ராஜபக்சவின் 10 ஆண்டுகால ஆட்சியில் இருந்த ஜனாதிபதி அதிகாரங்களை விரைவாக மீட்டெடுத்தார்.

மிகவும் பணிவுடன் ஆட்சி செய்யக் கற்றுக்கொள்வதற்குப் பதிலாக, 75 வீத மக்களைக் கொண்ட சிங்கள பௌத்தர்களிடையே தேசியவாதத்திற்கான வேண்டுகோள்களுடன் கூடிய ஜனரஞ்சக எதேச்சாதிகார குடும்பத்தின் முத்திரையை மீட்டெடுக்க ராஜபக்ச விரைந்தார்.

ஆனால் அந்த உத்தி விரைவில் தோல்வியடைந்தது. சமீப நாட்களாக உணவு மற்றும் எரிபொருள் போன்ற அத்தியாவசியப் பொருட்களுக்கு இலங்கையில் பணம் இல்லாமல் போனது, இது நீண்ட பெட்ரோல் வரிசை மற்றும் தினசரி 13 மணி நேர மின்வெட்டுக்கு வழிவகுத்தது.

இதனால் ஆத்திரமடைந்த குடிமக்கள் ஜனாதிபதியை பதவி விலகக் கோரி பல வாரங்களாக கொழும்பில் உள்ள ஜனாதிபதி அலுவலகத்திற்கு வெளியே முகாமிட்டுள்ளனர்.

கடந்த 20 வருடங்களில் 12 வருடங்களாக ராஜபக்சக்கள் அரசாங்கத்தின் உயர் பதவிகளில் இருந்ததாகவும் அந்த அறிக்கையில் குறிப்பிடப்பட்டுள்ளது.