வைரமுத்துவுக்காக சின்மயிக்கு வேட்டு !
வைரமுத்து மீது #MeToo மூலம் பாலியல் குற்றச்சாட்டு கூறிய சின்மயி டப்பிங் சங்கத்திலிருந்து அதிரடியாக நீக்கப்பட்டுள்ளார்.
திரைப்பட பாடலாசிரியர் வைரமுத்து மீது பாலியல் குற்றச்சாட்டு கூறிய பிரபல பாடகி, திரைப்படங்களுக்கு பின்னணிப் பேசும் டப்பிங் சங்கத்திலிருந்து நீக்கப்பட்டுள்ளதாக ட்விட்டரில் அவரே தெரிவித்துள்ளார்.
கடந்த மாதம், வைரமுத்து தன்னை பாலியல் தேவையுடன் அணுகியதாக கூறி பாடகி சின்மயி ட்விட்டரில் பதிவிட்டார். இது பல சர்ச்சைகளை கிளப்பியது. வைரமுத்து மீது சட்டப்படி நடவடிக்கை எடுப்பேன் என கூறி வந்த அவர், இதுவரை எந்த புகாரும் அளிக்கவில்லை.
திரைப்பட பாடகியாக மட்டுமில்லாமல், சின்மயி முன்னணி டப்பிங்க் கலைஞராகவும் உள்ளார். தெலுங்கில் சமந்தா, தமிழில் த்ரிஷா, காஜல் அகர்வால் போன்ற முன்னணி கதாநாயகிகளுக்கு இவர் தான் படங்களில் பின்னணிப் பேசி வருகிறார்.
